Blog Vrbanj

Klepalo 

Kad bi u litnje pripodne došla deseta ura a di ću.....ma gren malo na Klepalo. Pri večere a di ću izgubit vrime....gren malo na Klepalo. Posli večer i Dnevnika a di ću....ma gren opet malo na Klepalo jer tamo će uvik bit niko za dvi riči ili progovorit ili slušat druge, za čut koju batudu za se nasmijat, za čut novitodi. Već je 11 večer a kaldura je i ne gre mi se spat. A di ću....ma ostat ću još uru, dvi na Klepalu. Uvik će doć kogod iz bufeta za fremat na ćakulu pri sponja. Moli Mote, Miko Šćepo, Polo Pumpin, Ivo Žugo, Ivica Barbasov, Miko i Jakov Barbasovi, Petar Budrovića, Marin Vidošev, Ivon Tresića, Ivon Bukalotov, Ivica Bukalotov, Andrija Račića, Dinko Balolića, Jakša i Ivica Štrambotovi, Jakov Alelujin koji bi doni novitodi kad bi učini zodnju turu taksijen iz trajekta, Petar Alelujin, Pero Majdana, Andrija Vidošev, Ivica Budrovića, Božo Ušatića, Ivon Kapulica, Nade Vidošev, Antun Markov, Bare Baretov, Jurić Dujetov, Duško Čubretov, Ivon Fronin, Miro Gujičin, Miko Markov, Damir Vidošev, Antun Škandejin, Mili Kapitonov, Zane Rokotov, Jakša i Ivica Kapitonovi.......a bit ću baš koga i priskoči. I tako iz dona u don, iz noći u noć se je jazicima "klepalo" na Klepalu sideć na bokun kartuna na ovo skalinih od stine dokle Mote Ušatića ni stavi plastične katride. A odma iznad nos u kući na kantunu štrode za u Goj bi bi spo likor i humanist Ivon Vidošević. Provovo zaspat jer od naših glosih i digod i vike od kontreštonja teško da je moga zaspat a ujutro je vajalo u ambulantu, po noći je vajalo skočit ako ko dojde zvat likora jer tad ni bilo Hitne. Ma nikad ni riči od njega da bi nan reka ...umuknite već.

A danas...Klepalo prozno. Ništo malo ča nas je ostalo se skupimo pridvečer isprid butige na skalinu ispod Vinke Račića kuhinje......ma i to ritko. A....svako vrime nosi svoje brime. Vrime Klepala je pasalo. Stoji Klepalo prozno, žali za judskin glosima, pribire uspomene na droge jude ča ih već ni i na njihove batude. Stoji i čeka nika nova vrimena.

Klepalo iz uspomena u litnje pridpodne : Bare Baretov, Andrija Račića, Jakov Barbasov, Jakša Štrambo, Ivica Budrovića 22.06.2008