Blog Vrbanj

NONE

Stvorene su bile da dariju druge,

a sad stare, suhe pomalo se kreću;

kad gredu po kalah uz mir se daržidu,

i pomalo gredu, gredu i šebeću.

Kad su divnje bile s materan su doma

ocu, braći, stanu svoju pomoć dale,

uz vridice, brave, kotlenke i žarna

i s brimenin teških, ča su same brale.

U novemu stanu dale su iz sebe

živote i snagu, veseje i žalost;

nemoć dice, muža, i njih je bolila,

snaga, zdravje dice bila jin je radost.

Sad zgarbjene, suhe od brimen i trudih

u žepu travese svej sobon imaju

krunice, mendule – da s molitvan martve

s mendulin unuke male darivaju.

S tin jih sad dariju, jer ne mogu s drugin,

u jubavi sriću našli su najveću...

I kad gredu vidit dice svoju dicu,

uz mir se daržidu, gredu i šebeću.

Napisao Pere Ljubić, čakavski pjesnik rođen u Vrbanju 01.07.1901 u kući na Viru u kojoj danas živi obitelj Silbe i Perice Vukičević a na kojoj je i postavljena ova spomen ploča. Umro je 21.11.1952 u Zagrebu.

Moja nona Vica Fredotović Budrović iz Stranice, rođena Pavičić Blaćetovi, materina mat slikana u vejači 1980 a umorla u vejači 1986. Očeve matere i moje none Ljudmile (Mile) rođene Matković iz Markovih u Gorici a kojon su braća bila Tonko Markov, Andrija Šendik i Jure Balolić te sestre Mare Markova i Nevenka Ljubić se jedva spominjen i to somo kroz nikoliko nejasnih sličic u dičjen ponćenju  jer je umorla kad san jo imo 4 i po godišća.