Blog Vrbanj

 Sutra je Blagoslov u Gorici

1-Znomo da u Goricu kurot neće doć pri 11 ma u 8

smo svi već altret i probučeni u boju robu.

2-Pomest isprid kuće, hodnik i kuhinju i naložit špaher

3-Poć u butigu kupit čogod pasketarijih dici za na

stol i razminit šolde za dici stavit u torbicu.

4-U 9 su muški već na Klepalu i nazaziru se di je

kurot a misa još ni ni finila.

5-U 9 i po čuje se jednega ča javije iz Podmurvice.....

.... evo porti je pud Stranice ma dole ni puno kuć i

učas će...

6-U 10 i po čuje se izvidnika...evo ga u Ivice Gašperina.

Sad će borzo, učas će to on i tarč doma podložit

u špaher.

7-10 i 40 evo ga u Žige ...javije se iz Podmurvice,

još Ivo Markov pok će u Goricu. Ma u Ivota bi se

moga malo veće fremat?

8-Evo ga u Mikota Markovega. Još četiri fameje i

arivat će. Veselo doma tarčin vidit jel u kuhinji sve

na mistu .

9-Kurot i dica su intrali u Andrije (Ni veći Andrije ma ime

je ostalo)

10-Tarč doma već nervoz i računon još Jakša, Vinka i

Balolić.....još baren 20 minutih i mogu još stot u

teplo. Klepalo prozno svi susidi već doma čekadu.

11-11 i 10 čuje se šušur i Mir kući ovoj....izlet veselo

vonka i svako godišće iznenođen kako su učas

došli pozdrav se sa kuroton, introjmo u kuhinju,

izmolmo ča gre, obavi se molitva i blagoslov a kurot

i dica partiju u Šćepotovih jer do obida vajo doć do

sv. Roka.

12-11 i 20 rastvoran ponistre od kuhinje da izojde vonj

tamjana, maške ča su utekle od dice se vroćadu.

13-Uzdahnen duboko......uffffffffff....finila je i ova..

...... i sad mogu skalat lampice isprid kuće!

14-ovo 14 dopisijen za sriću somo da ne fini na 13.

Nodan se ovako i sutra i još puno godišć i meni i

svima po Gorici i cilemu Varbanju.

(01.01.2017)

Fotografije ispod su dodane nakon Blagoslova obitelji 2017 godine.