Blog Vrbanj

Naše parvo kolendanje za svetega Ivana ili

"Kako smo privarili meštrovicu Ninu" !

U naše doba bila je skula i na sv. Stipana a mi smo 1963 bili u četvorti razred. Niži razredi su imali skulu popodne a to godišće smo dobili doma dozvolu da ka dica smimo parvi put poć kolendat. Ali vajalo je poć za vidila, obavit sve kuće i vrotit se doma kad stariji apena partiju kolendat. Zato bi se na prišu odtorkalo od kuće do kuće, zakantolo kako se je znalo one dvi, tri štrofe, vazelo koju pašuratu, umendul ili smokvu sa stola i veselo tarč daje. Starijima bi još bilo na stolu prošeka i ružulina ma non dici ne.

Ivanih je bilo dosta u to doba, somo u našemu razredu četiri, i ni bilo kad čekat da skula fini jer nećemo moć sve oboć navrime i kad je meštrovica Nina Gazetova na čas se makla iz razreda dvo nojvišja, Jakša Kapitonov i Ivo Drojčin su se popeli na klupe i malo odvidali obe sijalice. Kad se je počinjalo zaškurivat teta Nina je išla takat svitlo ma kako svitlo ni lavuralo zakjučilo se je da je "prigori osiguroč" i teta Nina nas je pustila doma. Tako smo uspili navrime svima zakolendat i bome bili sritni da smo privarili meštrovicu.

Ali.....ni sve išlo po planu, baren za "direktne izvršioce". Stipe Rozov je apena to godišće doša iz Fora i ni još uspi upoznat svoje varbonske rodbinske veze. Kad se je vroti iz kolendanja odma se je dičinjski pofoli svojon storon teti, didovon sestri, Morici ča smo napravili i ko je odvi sijalice. E, a njejina sestra Povica je bila odona u Boninih za barba Mikulu, Gabrića Boninega oca. A Gabrića sestra Morica je bila mat meštrovici Nini Gazetovon. I bome ujutro odma Morica Rozova je to sve isprovjala sestri Povici a ona prinila daje ćeri i teta Nina je sve saznala odma pri skule.

Bi je običaj u to doba da se dicu tuče palicom po rukami, rekli bi bili da smo dobili nikoliko sardelih, ako smo čo činili kako nevaja, ili nan libri i bilježnice bili neuredni, ili ako nismo napisali domaći....ma meštrovica bi nas bila poslala da somi donesemo palice. A mi smo uvik birali ne tanke jer one prašćidu nego koju storu debju ogrizinu koja će puknut nakon dvi, tri "sardele". Ali ti put teta Nina je donila soma jednu tanku palicu koja će prašćit. Ni nas teta Nina nikad tukla joko da nas zaboli nego veće onako reda radi da sačuva autoritet ali ti put je bila jidna i rekla nan je posli da to nismo smili učinit jer da smo pitali da nas pusti ranije radi kolendanja da bi nas bila pustila. I odma čin je intrala pozvala je oba "izvršioca prekida dovoda struje do sijalicih", Jakšu i Ivota i dola in sa to tanke palice ča prašći po desetak dobrih sardelih i još su za kaznu do odmora vajalo da stojidu svaki u svojemu "kutu" razreda. Tako Ivotu ni bi isprobi imendan.

Mi drugi smo pasali lišo ali nismo znali kako je meštrovica teta Nina to sve doznala dok nan kroz koji don stariji nisu objasnili rodbinske veze "izdajnika" Stipeta Rozovega  

Na donjoj sliki su Stipetu mat Katica, did Petar, nona Petra i teta Zora