Blog Vrbanj

 Božić mijor devetsto dvodeset i osme!

Bila je juta zima mijor devetsto dvodeset i druge a u Ivana Rozovega fameji po običaju do Božića ni zime ni glodi a po Božiću i zime a i glodi. Siromašni od uvik a izgleda i dovika. Ni fradid imo svoje zemje nego je lavuro na tujon zemji a nojveće u Dubovici jer smo je mi doržali. Bilo je i drugih varbonskih famejih tamo ali oni su doržali druge vale a Vodanovići i Petra Svidoka fameja sa nami lavurali Dubovicu i Pišćenu. Po pol godišća stolo se je tamo, Ivanove ćeri i sestre se ludile za Zaraćanima i Foranima pok su mu se dvi sestre i odale tamo, jedna u Zaraće u Barišićih, jedna u For u Kolumbićih a nojmlaja ćer u Milnu za Tudor Ivana Velega. Dvodeset i sedme Ivon je tamo i ispusti dušu....doša iz poja napožo se na stol u kuhinji iza crikvice u Dubovici, glova ujedonput klonula na stol i Ivana već ni bilo, bez da je i glosa pusti i bez da se je pozdravi. Teški lavur bez i grozda svojega a filoksera je počela jist i to tujega lozja i ni bilo druge nego Ivon je reka sinu Perkotu da vajo poć u Argentinu čogod šolda ćapat za priživit i kupit koje poje malo bližje Varbanju. Dvi sestre još neodone, od sedan ćer tri još neodone i vajalo se je pensat. I tako oko Božića mijor devetsto dvodeset i druge odlučeno je da Perko porti u Amerike. Pozojmilo se je te zime šolde za pašoj i u petemu dvodeset i treće Perko je porti a ostavi ćer Mariju od tri godišća i ženu Milu noseću. Piso je on digod koje pismo doma ma somo je dobi jedno nose jer nikad ni sto puno na jednemu mistu i imo svoju adresu. Urugvaj, Paragvaj, Bonezaires i Argentina su bili mista di je isko posol na velikin pojima šenice di su već tad imali parne kombajne. Somo jedno pismo je dobi i to na adresu jednega otočanina iz Grobja koji je tamo bi od pri i u njemu sazno da mu se rodi sin Ivon ali za smart oca ni zno. Vidi je svega grubega tamo u tujen svitu a nojveće jude iz ovih krajih koji nisu nikad uspili skupit šold za pašoj nose i još vrotit dug. Njihova sudbina ga je natirala da čin je, nakon pet i po godišć, skupi bokun šolda odluči se tornat početkon njihovega lita a početkon naše zime jer je zno da ako kroz lito ne nojde posla jer i Argentina je počela ćutit svjetsku krizu, zimi će izist ovo ča je usparenjo i već nikad neće doma. Kupi je kortu, ukarco se na vapor i priko Triešta doša ovamo. Kako je putova do doma ne znan ali pontin njegovu besidu o temu kako je doša na Pjacu. Doša je u Varbonj oko podne mijor devetstvo dvodeset i osme malo prid Božić i vidi jednega molega čornega kako se igra po Pjaci. Pita ga da čihov je on a on mu odgovora: "Jo san Perkota"! E tad je parvi put vidi sina koji je već imo pasonih pet godišć. Kako se je tad ćuti i ča mu je pasalo kroz glavu to somo od zno. Izgubi je sve done dičje igre sa sinon a kad je doša doma vidi je mater Mariju di plače i od sriće ča ga vidi a i od tuge jer kad je pito za oca vajalo mu je reć da je Ivon umar u Dubovici i da je vajalo dvo dona dok su in jovili i dok su ga na živemu donili od tamo i zakopali bez blagoslova sina. Tad se je zavitova Gospi, jer virova je nojveće u Nju, u svetega Antonija i imenjaka svetega Petra, da će nosit Križ u zahvalu Njoj ča mu je dola pameti da se navrime vroti. Kvodar sa slikon Gospe je dokle god je Perko bi živ sto obišen na soli a kipić svetega Antonija na njegovemu komu. Zovit je obavi i mijor devetsto i tridesete je nosi Križ. Dug za pašoj je vroti a sa šoldima ča su ostali kupi poje Carevac. To je tad bilo veliko blogo. Svih pet motik je nasodi loze i na svojemu moga ubrat dici grozd kad je iti a ne ga sakrivat meju lozovinu na dno sparte da ga gospodor zemje ne vidi. Božić mijor devetsto dvodeset i osme su nakon pet godišć dočekali skupa u molon kuhinjici sa gronon umendula na kominu koju je Perko kako glova fameje polivo čornin vinon izmišanin sa ujen od masline. Danas bi se to reklo da je zalivo Badnjak. Mat Marija, sestra Zorka, žena Mila, ćer Marija i sin Ivon jer su se druge sestre dok njega ni bilo doma već bile odale.

A danas kad bi i moga prodat ti Carevac ne bi za njega moga dobit šest mijorih eurih. Nojveće mijor eurih donkve vridi svako njegovo godišće u tujemu svitu bez fameje, bez vidit tek rojenega sina, bez sprovoda ocu. Di si bi? Nikud! Ča si čini? Ništa! Život je paso i njemu kako će i svima nami ali eto da se spontin Božića 1928, prirano umorle none Mile i dida Perkota s njegovon pipon, sa vaporon meju zubami kojemu je humor dimi "i don i noć" i da mu se zafolin za lipo ditinjstvo i sve ča me je nauči o životu a to je da i u nevoji i neimašćini vajo ostat čovik i somo čovik i činit dobra dila komu god moreš a ako tebi ko čo i učini grubega zaborav to odma i ne osvećij se jer, Perko je tako virova, čovik je moli da se sveti i ima niko iznad nos koji će svakemu odrizat pokoru kad za to dojde vrime. I ti Perkota nauk neka bude i moja poruka i za ovi Božić. Proživili ga svi štioci sritno sa svojima famejima!