Blog Vrbanj

Važetići!

E znon, reć će kojigod od ovih mlajih ....ma ča nan ova stora mona stavije slike običnih važetićih kojih danas hitamo u smeće po nikoliko na dan. Eeeeee...... ma nikad pri ovo nisu bili obični važetići. Ovo je za moje none, dide a i oca i mater bilo blogo i to velin slovima BLOGO. Ni svak imo važetić a ko ga je imo čuvo ga je ka zloto, a baš i boje nego zloto. Al si tad imo za kupit konzerve? E da!!!....ni se ni znalo ča je konzerva jer su je stori vidili somo u ratu ako je koja ostala iza Njemcih, Talijonih ili od ingleške spize koju je doma doni sritnik ka ča je bi moj did po materi koji je u ratu bi bolničar na Foru a po sanitetski materijol je hodi na Vis i od tamo bi digod doni to blogo, te viške važetiće od ingleških konzervih. Ma bome kako je uvik imo pune sakete drugega materijola ni bilo ni mista a baž ni napamet svaki put iz Visa i koji važetić donit. Susidi su znali da ih on more donit pok bi u nos zojmili ma ritko vroćali a did bi noni reka "Ma ne baceloj, ča će ti to, je ih na Visu koliko hoćeš". E, je ih bilo na Visu ali u nos nojmanje dok ni nona počela sakrivat važetiće. I od tad je u našon fameji po materi i susidstvu bila ostala govorojka onako u taroku kad se čo izgubi ili ko ne vroti pozojmjeno "Ma ča baceloš, je tega na Visu koliko hoćeš" Čuvalo se je ovo kako oči u glovi. U poju se je važetić sa provislon od findefera sakrivo dosta daje od gustirne pod koje suho gronje jer ako ostane na gustirni osta se bez njega. Sa njin bi se zapulo vodu iz gustirne a ovi manji kojemu bi se mlačićem potuklo rube da ne posičeš pešnje bi je nojlišji žmul od kristala za se upoju napit. Imat oba....i molega i velega.... e to ni moga svak!!! A doma su ovo bili nojlišji potići za skuhat čogod na kominu. Lipo ga sa provislon i kočulon obisiš na komoštre i eto ti pot boji od Ceptera. A i ovemu molemu bi se stavilo provislo od bokun ruzinavega findefera ča je ostalo iza rata i skuhalo joje u njemu. Bome ne joja nego baš joje. Jer imat dvo joja za skuhat i to je bilo blogo ili je bila velika bolest pok bi se jednega pozojmilo u susidih da se bolesnik okripi. A danas su druga vrimena ma štoriju iz ditinjstva o važetiću od konzerve kako velikemu blogu eto želin prinit i mlajima kojih to interesira. Kako je pojam bloga varijabil!!! Jutros san ih tri hiti ma uvik iman sačuvano baren po dva veća i manja "da se nojde doma" za nedaj Bože potribu. Ča ditinjasta glova ćapo stora već ne pušća 

Konzerve iz 2. svjetskog rata