Blog Vrbanj

Moja štorija o prijateju Andriji Turić Koletovemu!

     Bi san molo dite i imo niku biciklicu na tri kola sa darvenin sicen i pedalima na parvemu kolu ča bi je bi vozi pridvečer po betuniću isprid spomenika. Jedon don je na nju se moj stariji zermon Nikica iz Vrisnika i kako već težji i jači nehoteć je slomi jednu pedalu. Otac je reka da nima veze jer da će on to odnit Andriji Turića, a po fameji su ih zvoli Koletovi, da zavari. E tad san parvi put ču za Andriju. On je, a bit će ka naučnik, lavuro u kovoča Glovinega kovačiji na Pjaci i tad dokle mi je to Andrija vari su mi ostale u očima slike aparata za varenje na garburu i slike ognja na kojen je kovoč Dinko Glovin sa sinon Cviteton grija motiku za je iskovat. Andrija i moj otac su bili veliki prijateji i puno hodili skupa na ribe u Oskorušicu a bili bi i mene vazeli s sobon. I spominjen se jedne, sad mi i smišne Andrijine dežgracije. U Tatinji na bondu od Givnika je bila jedna rapa u kojoj je znala bit velika kirnja. Vajalo je varhovak vorše sa vorškon namistit na rapu da kirnja ako izojde iz rape odma intro u voršu a kako je bilo morete od tarmuntone to nisu mogli iz kaića nego je Andrija ćapo konop koji je bi vežen za voršu i skoči na kroj za je lašnje namistit a otac gleda kroz caklo i kumando. I kad je namisti voršu iša je skočit u brod ali kako je moreta makla brod moj ti Andrija trusa u more. A bila je već kasna jesen i bili smo u jempere. I tako mokar je veslo da se ne ohlodi do vale i kad smo se uspeli do kućice je naloži ogonj, svuka se i osuši robu jer bome promine ni bilo. Voli je Andrija u mlaje done i kaču ma jo nison bi od kače i malo se tega spominjen osin puških ča je som pravi pok su ih on i otac provovali u Punti. Bili bi je vezali za bor, za okidoč vezali špog, sakrili se iza zida da ih puška ne ruvino ako ni sve alavija i povukli špog za ižbarat.

     Andrija je bi provi sportoš. Voli je zaigrat na balote a i svaku večer je i to do kasnijih godišć igro na moli balun na betuniću isrid Doma i onda posli na pivu sa kumpanjijon. Uvik pontin njegove riči da mu je nojslaji šold ča ga je sa kumpanjijon istrati.

     Kad san fini parvi sridnje praksu san odlavuro u radionici Pharos Plastike u Pajizu i tote san apena poče upoznovat Andriju ka meštra. Bi san kako od struje dodiljen Ivotu Šepiću ma i uz Andriju, Tribunola i šefa radionice Vlahovića san puno nauči. A nojveće da alot i makine uvik vajo doržat složene, uredne i čiste. Uči me je Andrija lavurat i na drebang. Ne puno, ma nauči san dosta za moje potribe. Bi se je Andrija tad već poče i ženit sa mojon oduvik prijatejicon iz Dola Rinon. Pontin jedno jutro kad san hodi biciklon na posol a još ni bilo asfalta i bicikli se po ono grotulama probila goma i jo bome biciklu na rame i nanoge do posla. Tad se je Andrija zafrkovo da Pero kad mu se priši vazme biciklu na rame da pri dojde. A puno putih san iša na posol i sa Andrijon sideć u njegovon prikolici ča je imo na motoru, a malo svita je tad imalo prikolicu za motor.

     Ni bilo stvori ča se tiče svih vorstih motorih a pogotovo brodskih ča Andrija ni zno popravit. Meni je uvik bi parva i nojveća pomoć za popravit auto. Nikad, ma baš nikad, se ni dogodilo kad mi se je čo dešvalo na autu i jo doša u Andrije da je reka "niman kad, dojdi sutra". Bi bi reka da somo malo čekan dok ne fini dil posla koji ni moga prikinut i onda bi stavi oćole na oči i odma mi pogleda ča je s auton. Ako ni moga odma popravit bi bi reka ča da kupin ili bi reka da dojden kad on to nabavi ili bi, ako je čo bilo manjega zla, svitova me kako doma to mogu som napravit. Nikad iz njega nison iša ća neobavjenega posla.

     E radi svega ovega ča san noto, a ima tega još puno ča je vajalo notat, uvik mi je žol ča sad pod njegovu starost nison pokozo zahvalu za sve ča mi je učini. Andrija je već stor, bolestan i ne gre vonka a jo san ga bi somo jedon put vidit i sa suzima san porti ća. Ne da ne bin ga iša vidit nego niman force za to, želin ga imat u očima kako Andriju iz mlodih don, punega života i veselja. Znon da to ni alavija i juski ma i Andrija i Rina su dobri ka judi, kapit će oni mene.

PS (12.11.2016): Da li slutnja ili nešto drugo ali prije pet dana osjetio sam potrebu da zapišem neka moja sjećanja o Andriji Turića i da ih objavim na ovom blogu. Njegova kćer mu ih je pročitala, bio je sretan da sam ga se barem na takav način sjetio i to je eto bio naš zadnji kontakt. Danas nas je Andrija napustio. Otišao je i on u legendu, tamo gore kod svog prijatelja Cvitana Glovinega iliti Majstor Vuka. Bilo je majstora raznih zanata, ima ih i sada a bit će ih i poslije nas ali samo su dva ušla u legendu Vrbanja, Majstor Vuk i Turić. Nema osobe u Vrbanju i okolnim naseljima koja je imala bilo kakav stroj na motorni pogon, od traktora, auta, motocikla, brodskih motora a da neće pamtiti njihovo znanje. Mnogi mlađi majstori su od njih učili. Majstor Vuk nas je napustio prije više godina a s Andrijom je otišao i posljednji vrbanjski majstor starog kova, snalažljiv i spretan u radu sa alatima i dovitljiv kako napraviti nešto od ničega. Neka ovaj zapis bude i moj osobni oproštaj od Andrije Turić. Andrija, počivao u miru Božjem!

28.02.1937 - 12.11.2016

Na ovemu letratu su Andrija Turića i njegov zet a moj susid Nikša Šćepo