Blog Vrbanj

 O barba Mikotu Ivejinemu ilitiga storemu Iveji!

     Barba Miko je još bome živ i u motu i ne notojen ovo za uspomenu na njega nego notojen moje uspomene o njemu iz mojih dičjih don. A zoč baš o njemu? Ma puno je tega zoč i neka to ovo štivo objasni!

      Ka parvo Miko Ivejin mi je kad san bi dite bi susid. Iz našega surola san vidi njegovu kuću, pasovo je svaki don puten nimo nos i bi bi me ka dite onako od dragosti ušćipo za obroz. Spominjen se i subote kad se je oženi a spominjen se i tuge kad je priseli u novu kuću u Sela. Ni to daleko, bome odma ispod spomenika, ma meni je to tad bilo daleko kako da je iša u Amerike jer ga već nison vidi svaki don i insurilo mi se je.

     Imo je barba Miko i drobilicu ma je meni iz mlajih don osto zaponćen u Varbanju po baren još dvi stvori, po toncima i po kinu.

     Bi je parvi koji je tuka u bubanj, oni veliki ča je na sebi imo figuru morskega pasa od nike kosti udilanu a baš i od plastike. On i barba Vlade Bulićev a posli i Dinko Briškulin su parvi varbonski mužikonti koje san jo zaponti na toncima i uz čihovu muziku san uživo gledat tadašnje tancadure koji su u kontu onega ča su vidil u kojemu filmu toncali i moderne tonce a ne somo ingliš valcere, valcere, rašpu i šaltin. E u očima su mi Pravda Šundetova i Miko Picolin kako su toncali twist i Miko se škinima savijo čupicon skoro do poda. U očima su mi i dražbe i trajtamenti i matere sa ćerinin kapotima na bonkima okolo kako pronoštikoju.

     Ali o toncima drugon prilikon a ovo je štorija o storemu Iveji koji mi je još veće osto u uspomeni ka dugogodišnji kino operater u Varbanju. Kad san fini parvi razred sridnje bi san kod njega to lito i na praksu da se malo naučin lavurat sa kino aparaturon i sve mi je to ostalo upamet ča me je Miko uči ma nojveće mi je ostalo upamet da san imo i jo čast pustit na gramofon pismu u pauzi dok je Miko minjo role filma. U tima pauzima jo san parvi put ču puno pismih sa Mikota pločih a tote san nojveće putih ču Crvene koralje. Svi "kauboji, indijonci, njemci, partizani, vitezovi mačevaoci" ča su se od popodneva borili meju sobon po Lojcima i Donjin borima imali su oružje ča je napravjeno po filmovima ča je Miko prikaziva. U Varbonj su dohodile loše i već istraćene kopije filmovih pok bi puno putih puka film i onda dok ga Miko ne zalipi svirile bi ploče tako da je meni to opet bilo dobro. Sve klasike filma san pogleda u Varbanju zahvaljujuć Mikotu koji je aparaturu održava sa povnjon. I još na kunju da napomenen i ovo: parvi cinemascop film "Put oko svijeta za 80 dana" je u New Yorku prikozan 1954 a Varbonj je drugi u Harvotskoj, već 1958 kad još nonci Split to ni imo, imo kompletnu cinemascop opremu i ekran zaobljen i stavjen pod kuten kako bi zadovolji cinemascop standarde. I naš Miketina je sve to održava i govori da je još sve alavija te se nodan da ćemo jedon put ćapat vrimena i poć sve to i slikat. Barba Miko fola Van na uspomenima iz ditinjstva i mladosti i puno nan još poživili