Blog Vrbanj

Štorija o Majdanu

     Živi je u Varbanju barba Mate Dedić zvon Majdan. On je i som sebe zvo Majdan pok smo ga svi tako zvoli i malo ko mu je i zno provo ime. Ni bi iz Varbanja nego nikud od Zagvozda a doša je sa ženon Anon u Varbonj ka nadničar i osto živit u Varbanju. Živili su u jednon potlehušici od 30-ak kvadrotih sa bokun dvorića di su doržali jaruha, navar Gorice u dilu ča ga zovemo Goj. Govoridu da se je jedonput jaruh bi razboli, ili ga baš ni bila voja za otpašivat pok je Majdan bi napiso na vrota od dvorića - "Ne vodit koze sa jarcem nešto nije u redu"  Imali su Ane i Majdan dvo sina, starijega Perota i mlajega Antuna i njih dvo su posli pučke skule finili zanote i ostali živit u Splitu. Posli su navar potlehušice dogrodili dvo mola apartmana svak za sebe ma Antun se ni nikad vroti za posve a Pero Majdana je kad je iša u penšjun sa ženon Ankon doša opet živit u Varbonj. I danas je moj dobričina, moj zenso Pero Majdana još u motu ma malo već stariji i ne gre puno vonka ali iz tarace ima lipi pogled na sva poja, na Varbosku, Jesu i more cili don uživat u pogledu a u Goju je uvik vitrića za liti odmorit tilo. A ima i lipu murvu u dvoriću do kuće na kojon se mi Goričani najimo murav. E ovo pišen ka malo veći uvod radi mlajih koji se Majdana ne spominju jer ga već odovna ni ali Perota Majdana poznajedu. Da bi sve imalo šug onega vrimena pisat ću ričima kako se je i dogodilo jer ako bi i slovo izmini da buden kako bokun finiji šug bi izgubi svoj gušt i to već ne bi bilo to.

     Donkve Majdan je lavuro sve i svakomu i po kućima i po žurnotima po poju da bi prihroni fameju. Ni biro posle, kopo je, zagnjojo, kosi a i sve druge posle ča je kome tribovalo. A imo je i lambik sa kojin je lambiko po Gorici i Stranici ( Velu bondu i Glavicu je lambikon pokrivo moj did Perko). I uvik kad bi ga pitali do kad će moć tako govori je da dok ga vrime ne slomi. Uvik se spominje njegova "ako te ništa ne slomi godine će te slomiti". I tako se je i dogodilo. Slomila Majdana godišća i ni se već ufa hodit na žurnote. I u ta godišća jedon varbanjanin je poslo sina da pita Majdana bil mu doša kosit. I moli dohodi i govori :

-"Barba Majdane otac pita da bistel mu došli kosit". A Majdan je reka riči koje i danas odzvonjadu Varbanjon:

-"Reci ti ocu da je Majdan svoje odjebao i otkosio"!

Majdana već odovna ni ma te riči "Majdan je svoje odjebao i otkosio" su ostale u Varbanju živit i uvik kad niko dojde ništo zamolit za mu napravit a već se ne ufaš ni sebi a kamoli drugemu užo se u Varbanju reć:

- E moj prijateju bin jo ma Majdan je svoje odjebao i otkosio!!!

     Vele ti san putih i jo to reka zodnjih godišć kad me još kvando i kvando dojdu zamolit da in čo napravin iz mojega zanota. I jo kroz tarok to rečen i dodon "Jov se komu mlajemu". Varbanjani se na to nikad ne sjididu jer znodu značenje tih Majdanovih ričih.

     I tako će Majdan živit na račun ovega dok bude Varbanja jer se ove njegove riči prinosidu iz kolina na kolino.

Barba Mate, fola na ovin uspomenima a fola i na murvi u vašemu dvoriću!!!

Pogled iz Majdana tarace

Majdana murva

Pero Dedić, stariji sin Mateta Majdana slikan 21.10.2017. Mlađi sin Antun živi u Splitu a i Pero je živio u Splitu ali otkad je u mirovini vratio se je u Vrbanj.