Blog Vrbanj

Legenda o mojemu fra fradidu Ivanu Budrovića

Kad se onako u razgovoru spomene kako čovik nikad ne zna di ga čo čeka užo se reć da se je jedon bi iša zlamenat u crikvi i od tega umar. I to ni onako izmišljeno nego van je to istina. Ajde ne baš od tega ča se je zlamena ma na kunju je ispalo da je. To je bi Ivon Budrovića, moje matere pradid i Ivice Budrovića oca pradid u doba kad se još nisu bili razdilili i kad su svi Budrovići stoli u Gorici. Donkve kako je bi običaj kad se je pasovalo utreso priko crikve isprid oltora bi se kleklo na donju skalinu za u kapelicu i zlamenalo se. I naš Ivon Budrovića je iša kleknut za se zlamenat ma bit će kako ukrivo sto i pošpalango je po saližu od kleha, po i slomi nogu. Tad ni bilo gipsa nego je vajalo ležat i mirovat dokli to ne zareste a kako je već bi stariji od ležonja je dobi plavuritu koja ga je odnila perke tad još ni bilo penicilina. I eto tako je od tega ča se je iša zlamenat isprid oltora Ivon Budrovića umar. Pokoj mu duši, na račun tega ga se i spomene a da mu se ni tako dešvalo već bi ga se odovna bilo zaboravilo.

     I tako nan sudbina dili svoje dore i nikad ne znaš hoćel ti udilit lipo ili grubo. I ne haje ona jes ti imo dobru voju ili si ništo od tavnosti učini. Moj fra fradid Ivon Budrovića se je somo iti zlamenat isprid oltora i od tega umar 

Na sliki je moj did Ivon Budrovića, zvon Tica jer je imo dobro kačadursko oko i nijedan tić mu ni uspi uteć, a koji je i dobi ime u svojega dida Ivana iz legende.