Blog Vrbanj

Paradiže  po Rudinski, po riceti Cvjetke Bogdanić, rođene Šoljan 

   Evo Petre, ni da je tuo niko velo pamet ni receta ma da se koguod ne bi noša uvridjen da zno boje. Svakomu svoje. U našon kuči...kako je činila moja nona Dinka od Kaštelaninovih iz Šejanove Rudine i naučila moju mamu Meri...tako činin i jo. Mliko, cukar i joja.

   Žumonce i bilonce se odvoji svaki u svoju visoku terijenu i dobro žbatije, bilonce somo a žumonce sa cukaron. Na svako joje cukara koliko ko voli slotko. Jo stavin 1 i po žicu. Ko voli....kako recimo jo, more sa žumoncima dodat vaniliju (1-2 kesice...po guštu). E ča son zaboravila, galetine Petit ili Sport....opet po guštu. Nojpri se paričodu galetine u terijenu tako da se izlomidu na komade i stavidu na dno terijene....da posli kad je potriba vadit bilonca ne bude oboj i nopoko. E, nison stavila miru za galetine. Jo ne volin da se kruto zgusne...nego da bude kaše od galetini i mlika...ma nevajo ni kad je kruto likvido...na litru mlika okolo...35 deki galetini....malo veče od pol škartoca Sport galetini. Mliko se stavi da uzovre, smanji se pinku jačina plina ili ploče i u to mliko se žicu po žicu skuho bilonce, koje se tako kuhono stavije na pruonte galetine. Kad se sve bilonce skuholo, u mliko ča je ostalo se uliju žumonca žbativena sa cukaron i dobro promišo da se cukar dorastopi i onda se to polije po galetinima i biloncu. Kad son jo bila dite, nona ili mama bi bile istargale pinku čikolote po temu...dobra je bila i ona tvordo za kuhonje, a danas smo se pofinili pok pospen Kraš expresa. Ako je potriba od nikih mirih......ovin današnji je 5 joj, 7 i po ne pripunih žicih cukara, 2 vanilije i litra mlika. Dodušije jo son dodola još otprilike žmul mlika jer mi se učinilo da mi je tega malo. Eto to ti je filozofija od Paradižeta. Meni se pari svukud ista.....a baž i ni. Svak imo svoje gušte. Pozz