Blog Vrbanj

Kaduja u starinskoj kućnoj apoteki

Kad san bi dite nikoliko listih od kaduje, ali ne puno da ne bude gorko, bi mi bili skuhali u potiću u dvo deca mlika i to san pi teplo za prehladu kad je škripalo u parsima. Sa malo zapraženega, ili kako se je užalo reć karamelonega, cukra to je imalo lip ukus i mi dica smo to volili. Govorili su stori da vajo pit teplo mliko sa kadujon 40 don prid sponje i onda leć u teplo ako je bi kašaj i bronhita. To je bi jedini lik jer drugega ni bilo osim teplin maslinovin ujen izmasirat dobro parsi pri sponja, omotat se vunenon pečon i dobro ubuć i tako leć. Obično bi se žica sa maslinovin ujen grijala na šteriku da se uje stepli. Liste od kaduje je bilo priporučljivo koristit friško uberene ali znalo bi se i osušit ga pok čuvat za štajun kad je ni. Ma na Ušatića u Dolac ispod Borcih je uvik bilo kaduje i tote smo mi iz Stranice hodili brat lišće. Govorilo se je da je kaduja nojboja ako je daje od mora ali da se od nje vidi more . Kaduja uz somo more se ni duperala. Lišće od kaduje se je žvakalo  ako se je imalo upalu desnih i ona uz somo more se je koristila jedino za to.

Priprema napitka od kaduje:

Zapražit dvo kućarina cukra na dvo deca mlika, ulit na to mliko da uzovre, skalat sa ognja i stavit nikoliko listih kaduje i vrotit na ogonj somo da hiti glogoj i onda maknut sa ognja i pokrit da listi pustidu šug ali doržat potić blizu tepline, na rubu ploče od špahera da se mliko ne ohlodi. Izvadit lišće i pit teplo ali ne privruće..

1.Sirup od kaduje:

Za sirup od kaduje nojboje je brat vorhe koji su se apena rascvali jer oni imadu u sebi nojveće ljekovitih sastojcih. Potriba je: 300g cvitih od kaduje, 50g limunske kiseline, 3 litre vode i 2,5kg cukra. Cvite od kaduje i limunsku kiselinu (limuntus) se iskuha i pusti da odstoji 24 ure. Ocidi se kroz peču, dodo cukar i opet  stavi da zakuha. Vrući sirup se izlije u boce koje vajo dobro zatvorit a čepe pri tega dezinficirat.

2. Sirup od lišća kaduje:

300g listih od kaduje, 2 kg cukra, 2litre vode i 50g limunske kiseline. Vajo ubrat zdrave liste bez grančicih i cvitih i onda se posložidu u expres lonac red kaduje i pospe malo limunske kiseline i tako se slože dok se sve ne istrati. U drugemu sudu se otopi 30dkg cukra i kad se malo zapraži ali ne i zagori prilije ga se sa 2 litre vode i pomalo kuha a usput dodoje ostatak cukra od 1,7kg. Kuha se oko 20min i onda se to sve prilije priko kaduje, zatvori expres lonac i ostavi da miruje 24 ure. Sutradon se procidi i prilije u bočice.

3. Sirup od kaduje:

50 cvitih kaduje (pod cvit se misli na rascvale vorhe kaduje), 2 kg cukra, 2 l vode (dobro bi bilo frišku kišnicu koja je odstola jedon don da prašina deponi), sok od 5 limunih. Prokuha se vodu i cukar i pusti da se ohlodi. Kad se ohlodi dodo se sok od 5 limunih i cvite od kaduje i dobro promiša. Ostavi se poklopjeno dvo dona da odstoji. Nakon dvo dona se procidi, ulije u sterilizirane bočice i dobro začepo steriliziranin čepima.