Blog Vrbanj

Preneseno iz lista Tartajun broj 4 od travnja 2009

DOBRA JOJA – DOBRE SIRNICE

Starinski običaj noroda i Crikve je da se za Uskars pituroju

joja utvordo i čini slatko sa puno joj. To je zato jer joje znači

početak života.

Pok je zato Uskars bez sirnice kako i cvit bez vonja.

Mira za sirnicu: na 1 kg muke gre 8 - 10 dkg kvosa, 25

dkg cukra, 10 dkg masla ili masti, 6-8 žumoncih i od pol

biloncih učinit „snig“. Dodat mlika po potribi da tisto ne

bude tvordo.

Muka se prosije navečer i na stogu brašna se učini jama

po sridini za kvos. Kvos se rastopi u 2-3 žlice mlokega

mlika, žlicu cukra i 6 dkg muke pok se pusti da se malo

digne.

Kad se kvos diga, zamisi se sa mukon. Vajo izmisit tvordo

tisto koje se pokrije priko noći i pusti da se digne.

Ujutro rano vajo zamisit maslo, cukar i temu dodat jedno

po jedno žumonce, malo soli, likera od ružih, ruma,

maraskina, mloko mliko, ostrugonu koru od limuna ili no-

ronče. Temu se dodo 3-4 istučena bilonca u „snig“ i sve

se skupa izmišo sa onin tiston i ostavi digod na toplo 3-4

ure da se tisto digne.

Nakon ovega rasiče se tisto i učinidu kruhići od kvarat do

pol kila koje vajo opet dobro zamisit i učinit ih okrugle. Sad

ih vajo stavit na nauljenu kortu i pokritih pečon, a priko nje

sa još jednon vunenon pečon i tako ostavit 2-3 ure.

Kad se to diglo, vajo ih malo otkrit i zasić po vorhu, na tri

dila, namazot žbatonin žumoncen i cukron, a za dicu se

stavi jedno joje (opiturono) u sridu. Sad se sve to stavi peć

na sridnjoj toplini. Kad su sirnice ispečene, dici je gušt gle-

dot čihova je boje ispala.

Osim sirnicih, kako smo već i rekli, piturojedu se joja. Joja

se nojlipje opiturodu tako da se zavežedu u kalcetu

(najlonku), na njih se stavidu listi petrusimula i tako vezoni

se kuhodu u vodi u koju smo hitili kore od čarnjene kapule.

Sve ove današnje piture ne doju tako dobru pituru kako

kapula.

Gotove sirnice i piturona joja nosidu se na parvu misu na

Uskars, zamotone u bili rakamoni tavajol. Jedna sirnica i

onoliko opituronih joj koliko je ukućanih, i još jedno joje

kako dor kurotu.

A kad je misa finila, a fala Bogu, onda se doručkuje, pije

kafa i služi sirnica i joja a oni nojzaigraniji, i mlodi i stori,

igrodu se kome će parvemu uspit razbit joje onega drugega.

Bez obzira na današnje lipe i mirišljave i dugotrajne sirnice iz

pekarih znon pouzdano da još puno naših ženih pravi

domoće sirnice i dok je tako, dobro je, jer bidno je ono misto

koje zaboravije svoju tradiciju i običaje...

Napisale: sestre Fani, Silvija i Marlena Pavičić