Blog Vrbanj

VELA ŠETEMONA (Željko Lušić, ožujak, 1991)

-Dohodi nan Vela šetemona

Od molitve i od barabona.

-U četvortak veli kad misec zasvitli

Običaji stori, običaji lipi.

-Jedon za drugin prosecjuni gredu

Tako od starine i uvik u redu.

-Božji greb u sjaju treperućih svića

S križen od šenice i sa puno cvića.

-Križonoša čeka u duši ponižen

Da ispuni žeju "nosit Križ za križen"

-Kandiliri, feroli, torci, kandaloti

U tonikah svi su ili pok u koti.

-U veleti čornoj Isukarst na križu

Sa svon svojon mukon sarcu nan je blizu.

-Kantadura oba složno zakantaju

A trojica drugih već odgovoraju.

-Spasitelj naš gorku danas

Smart na križu podni za nas

-Sliši mati Isusova

S pomnjon velon svaka ova.

-Tužna mati tad se uputi

Puten čineć plač prijuti.

-Ove pisme uvik s radošču se sluša

Radi gluhih zvonih tot je škrabatuša.

-Za križen je iša ko je kako moga

Cilin božjin puten molilo se Boga.

-Za sve one store i mlode u cvitu

Za sve one doma i u tujen svitu.

-Za mortve i žive s radošću u duši

Za svakoga da se ove noći skruši.

-Varboska, Jesa, Pitve, Vrisnik, Svirče,

Svaku crikvu s grebon uvik se dotiče.

-Osin crikve vonka, nikud se ne stane

U Varbonj se dojde kad se već rasvane.

-A onda u crikvi procesjun je kraju

Još dvi lipe štrofe tad nan zakantaju.

-Evo san ti na križ doša

Muke vele jesan proša.

-Jer ispunih volju tvoju

Sada primi dušu moju.

-Veli petak večer opet funcjun ista

Svi su križi vonka priko cileg mista.

-Pašijun se ćuti u cilen selu

Baldakin i Oštensorij u bilemu velu.

-"Barjaci kreću kraljevi"- daleko se čuje

Od kućih i putih lipo odjekuje.

-Škrabatuša šuška, blagoslov se doje

Zodnja štrofa plača u crikvi oldoje.

-Tila tvoga sveti zlamen

Svarh nas budi uvik, Amen!