Blog Vrbanj

Zavila se višćica navar Barda,

i odnila molega Ivana.

Odnila ga na Rašnik u jamu,

da ne smeta po Varbanju !

Rašnik je dil varbonskega konfina sjeverno od Dračevice pok prima Broču a granica istok zapad mu je put od aerodroma za na Dračevicu i na istoku put za Basinu. Tamo ima puno storih kućicih jer su varbanjani pri dosta stoli na Rašniku. Bilo je bližje za upoje nego iz Varbanja . Rašnik ni bi baš obradiv, veće kamenjar ali nahodilo se je zemje i za malo lozja ma uglavnom masline. Sad je cili obresa i sve su bori ali lipo je šetat po njemu i gledat te store kućice još dosta i sačuvane i uživat kad ih nojdeš sakrivene u bušku. Na sjeverni dil Rašnika, di se je već bližje moru, se nadoveziju varbonske Rudine pok se tote na prelazu, a sve od fameje do fameje, niki dili zovu i Rašnik a niki i Rudine. A pismica ka pismica, kantala se je obično kad bi se sa dicon igralo ono na kolinima, zibalo ih se naprid-nose daržuć ih za ruke a dica da sididu na kolinima i onda na riči "po Varbanju" bi ih se bilo ćapalo pod ruke i diglo u ariju a dica se bome smijala i somo govorila...još, još 

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Jedna mola plače,

za bokun pogače.

Mama ju je tišila,

pečenima mišima!

>>>>>>>>>>>>>>>>>>>>>>>>>>

Tanculi tanculi moj Martin,

jabuke su po šoldin,

a naranče po dinar

mali (ime djeteta ) gospodar!

>>>>>>>>>>>>>>>>>>>>>>>>>>>>

Picokara Pinka 

porodila sinka.

Hitila ga niza skale

i rekla mu:

Šo tovare!

>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>>

Jedon moli poputiću

pod čarnjenen klobučiću,

niti piši niti koki

nego veselo doma dotorči!

(dječja zagonetka-kokot)